Jýyrda ómirimdegi asa mańyzdy kezeńniń birin bastan ótkerdim. Astanadaǵy Ulttyq ǵylymı kardıohırýrgııa ortalyǵynda júrek qan tamyryma kúrdeli shýnt ornatý otasy jasaldy. Bul sheshimdi qabyldaý ońaı bolǵan joq. Biraq medısınaǵa, onyń ishinde óz isine janymen berilgen dárigerlerge degen senim meni serpiltti. Úmit pen úreıdi teń arqalaǵan jaýapty sátte janymnan tabylyp, qoldaý bildirgen dárigerlerdiń kásibı sheberliginiń arqasynda kúrdeli operasııa sátimen aıaqtaldy.
Osy rette, Elordadaǵy emdeý mekemesiniń Gúljan Shalataıqyzy jetekshilik etetin №2 kardıologııa bóliminiń mamandaryna degen shynaıy alǵysymdy baspasóz arqyly jetkizgim keldi. Bul maqala arqyly olardyń eńbegine bas ıip, otandyq medısınanyń órkendep kele jatqanyn, júıeli qadamdar men adamı qarym-qatynastyń em-dommen qatar mańyzdy ekenin aıtqym keledi.
Qaı iste de eń bastysy – senim men kásibılik. Bul qos uǵym Otandyq medısına salasynda keń óris ala bastaǵanyna kózim jetti. Janymdy aman alyp qalǵan júrek hırýrgııasy bóliminiń bilikti dárigerlerine, ota tobyna, medbıkeler men meıirgerlerge aıtar alǵysym sheksiz.
Adam ómirine arasha túsý – dáriger ataýlynyń eń uly mıssııasy desek, osy bir senimniń údesinen tabylyp, janǵa jubanysh syılaǵan óz isiniń sheberleri qandaı qurmetke de laıyq. Osy oraıda, ózime ota jasaǵan bilikti dárigerler Beslan Hýsaev pen Mýradym Mýrzagalıevtiń eńbegin atap ótýge tıispin. Bul azamattar –naǵyz maıtalman mamandar. Jetekshi kardıohırýrg retinde olardyń tek tehnıkalyq turǵydan emes, adamı qarym-qatynasta da joǵary mádenıetti, paıym-parasaty bıik jandar ekenine kýá boldym. Búginde olardy tek men emes, talaı naýqas alǵysqa bólep júrgenine kúmánim joq.
Úlken táýekelge bel baılarda búkil ómiriń kóz aldyńnan syrǵyp ótip, tereń oıǵa shomasyń. Emhana dálizine telmire qarap, ótken-ketken adamnyń janarynan jylylyq izdeısiń. «Kóńil – kóńilden sý ishedi» degen tirkestiń tamyryna tereń boılaısyń. Mundaıda bir ǵana jyly sóz – janǵa dárý. Joǵaryda atap ótkenimdeı, Gúljan Shalataıqyzy jetekshilik etetin №2 kardıologııa bóliminiń mamandarynan aıryqsha adamı jylylyqty sezindim. Bul bólim – bilim men biliktiń, meıirim men izgiliktiń ujymy dersiz. Ásirese bólimde eńbek etip júrgen jas mamandardyń yqylasy men iskerligi janyma jylý uıalatty.
Biz «Jastar – el bolashaǵy» deımiz, al munda sol sózdiń naqty beınesin kóresiń. Jan-tánimen qyzmet etetin, naýqastyń kóńil kúıin qalt jibermeıtin, kózinen qorqynysh baıqalsa, demeý bolatyn osyndaı jastarǵa qarap úmittenesiń, qýat alasyń. Ásirese jas mamandardyń kásibı saýattylyǵy, mádenıettiligi, naýqaspen jumys isteı bilý etıkasy qýantty. Qarapaıymdylyq pen sypaıylyqty serik etken olar – bolashaqtyń úmiti. Adam taǵdyry úshin kúresip júrgen jastarymyzdyń boıynan tereń tárbıe men adamgershiliktiń ónegesin kórý qandaı ǵanıbet.
Pyshaqqa túsetinimizdi oılaǵanda eriksiz júreksinip, bolmashy ýaıymǵa boı aldyrmaýǵa tyrystyq. Biraq dál osyndaı kezde jyly sóz, janashyrlyqpen jasalǵan qamqorlyq janǵa eń úlken demeý ekenine taǵy kózim jetti. Medbıkeler men sanıtarlardyń shyn kóńilden kórsetken yqylasy, óz jumysyna adaldyǵy men tazalyǵy – naǵyz adamdyqtyń aıǵaǵy.
Bul ujymdy aýyzbirshilik pen izgi nıetke jumyldyryp, osyndaı bıik rýhtaǵy ortany qalyptastyrǵan basshylyqtyń eńbegi zor dep esepteımin. Adamǵa degen janashyrlyq – naǵyz emniń bastaýy. Men osy júrekten shyqqan alǵysymdy dárigerler qaýymyna, ásirese Astanadaǵy júrek ortalyǵynyń qyzmetkerlerine arnaımyn.
Adam jany men júregi – asa názik álem. Sol álemniń tynysyn qalpyna keltirip, adam ómirin ajaldan arashalap júrgen aq halatty jandardyń eńbegi – ólsheýsiz. Jandaryńyzǵa saýlyq, qyzmetterińizge tolaıym tabys tileımin, izgi jandar!
Álim JÝSANBAEV,
Kedendik Odaqqa múshe memleketterdiń qurmetti azamaty,
Memlekettik kirister komıtetiniń úzdigi
